Kikosi cha timu yetu ya Young Africans kipo tayari kwa ajili ya mechi ya Mpumalanga Cup dhidi ya Augsburg inayoshiriki Ligi Kuu Ujerumani ‘Bundesliga’.

Mchezo huo utapigwa kwenye Uwanja wa Mbombela uliopo Mpumalanga nchini Afrika Kusini kuanzia saa 9 alasiri kwa saa za Afrika Kusini wakati Tanzania ikiwa ni saa 10 jioni.

Young Africans ipo Afrika Kusini tangu juzi Alhamisi kwa mwaliko maalum wa kushiriki michuano ya Mpumalanga Cup ambapo tutacheza mechi mbili dhidi ya Augsburg na wenyeji wetu TS Galaxy.

Baada ya mechi hizo zitakazochezwa Julai 20 na 24 kwenye Mji wa Mpumalanga, kikosi kitasafiri kwenda Johannesburg kucheza dhidi ya Kaizer Chiefs katika michuano ya Toyota Cup ambapo pia tuna mwaliko maalum.

Jana kikosi kilifanya mazoezi kuelekea mchezo wa leo na hali za wachezaji wote zipo vizuri huku tukitarajia kumkosa Pacome Zouzoua ambaye amepewa ruhusa ya kwenda kushughulikia matatizo ya kifamilia.